La oka renkontiĝo "Esperantistoj de Bjelovar al sia urbo" okazis la
18-an kaj 19-an de septembro 2020 en iomete nekutimaj cirkonstancoj,
kiel unu el maloftaj lastatempaj fizikaj renkontiĝoj de esperantistoj.
Ĝi okazas tradicie por festi la Tagon de la Urbo Bjelovar kaj la Tagon
de bjelovaraj defendantoj, kun la financa helpo de la Urbo. Kelkajn
tagojn antaŭ ol ĝi devis okazi, en Bjelovar estis lanĉita la konsilo
de la stabo de Civila protekto pri prokrasto de ĉiuj neurĝaj publikaj
aranĝoj sur la teritorio de la Urbo Bjelovar kaj Departemento
Bjelovar-Bilogora. Regis la opinio, ke la aranĝon en tiaj
cirkonstancoj de pandemio vizitos nur kroataj esperantistoj, kio poste
montriĝis ĝusta, kaj la aranĝon finfine partorpenis nur kvardeko da
aliĝintoj el pluraj kroatiaj urboj, sed sen partopreno de
eksterlandanoj.
Antaŭ la komenco de la aranĝo, la 10-an de septembro en la Popola
biblioteko "Petar Preradović" estis malfermita modesta ekspozicio
"Kroatoj en Ĉilio", kiu anstataŭis la planitan programon pri la sama
temo, en kiu devis partopreni gasto-esperantisto José Antonio Vergara
el Ĉilio, sed pro la pandemio de koronviruso li nenial povis atingi
Kroation. La ekspozicio restos malfermita ĝis la 30-a de septembro.
Al la publiko estis ofertita ankaŭ tre interesa pentraĵekspozicio
"Akvarelaĵoj" de la franca pentristino kaj esperantistino Lilli
Giloteaux (1924-2013) en la Kafejo kaj dolĉaĵejo "Zagorje", posedata
de Božidar Zagorec. La ekspozicio, organizita per klopodoj de la
pentristina filino Nicole Else el Aŭstralio, estos vizitebla ĝis la
18-a de oktobro. 
Pro la jam menciitaj kaŭzoj, neniu el la ekspozicioj havis oficialan
publikan malfermon, kaj la planita interkona vespero en la dolĉaĵejo
"Zagorje" estis nuligita.
La ĉefa tago de la aranĝo estis sabato, la 19-an de septembro, kies
programo restis senŝanĝa, ĉar plejparte ĝi okazis en la teritorioj de
la Departementoj Koprivnica-Križevci kaj Virovitica-Podravina, kie la
epidemiologia situacio estas pli stabila. Je la 9h00 en la preĝejo de
sankta Antonio de Padova en Bjelovar okazis sankta meso en Esperanto,
celebrita de patro Rikardo Patafta, cetere membro de Bjelovara
esperantista societo. Post la meso la ĉeestintoj kunestadis en la
preĝeja korto, kaj poste en la prelegsalono de la Paroko de sankta
Antonio de Padova okazis jarkunveno de Kroata Esperanto-Ligo, kies
membroj plejparte alvojaĝis per speciala buseto el Zagrebo.
Post la jarkunveno estis vizitita la ekspozicio de Lilli Giloteaux en
la dolĉaĵejo "Zagorje", kaj post la vizito kolono de aŭtomobiloj
direktiĝis vizite al la Dokumenta Esperanto-Centro en Đurđevac, kie la
gvidanto de DEC Josip Pleadin konigis al la gastoj la progreson de
laboroj en la domo de DEC, kiu dum kelkaj pasintaj monatoj estis
interne farbita kaj ricevis modernan hejtsistemon. Por la unua fojo la
gastoj de DEC povis konatiĝi ankaŭ kun la arkiva kolekto, ĝia funkcido
kaj ebleco uzi la materialojn, kaj kun la novaĵoj el la laboro de DEC,
ekzemple kun publikigo de novaj libroj, informo pri partopreno de DEC
en la programo Erasmus+ kune kun esperantistoj el Pollando, Britio,
Francio kaj Italio kaj kun la preparoj por startigo de propra
interreta paĝaro, kiu ekfunkcios la 1-an de januaro 2021. 
La lasta parto de la renkontiĝo okazis en la natura medio de la
vilaĝo Križnica, kiu situas en la regiono de la rivero Drava, tute
proksime al la hungara landlimo, ĉe la urbeto Pitomača. Transiri
Dravon eblis per pramo, sed plej multaj vizitantoj atingis la alian
bordon de Drava trans la pendanta ponto por piedirantoj. Por ĉiuj
gastoj estis organizita transporto al la restoracio "Dravska iža", kie
okazis komuna tagmanĝo.
Post la tagmanĝo estis prezentita infanlibro (bildlibro) de la
bulgara aŭtoro Julian Modest "La aventuroj de Jombor kaj Miki",
publikigita ĉe Dokumenta Esperanto-Centro. La prezenton gvidis Josip
Pleadin kaj Zdravko Seleš, kaj en la programo partoprenis ankaŭ la
junulino Ivana Pleskina, kiu ilustris la libron.
Fine ni povas konkludi: Kvankam la cirkonstancoj de la aranĝo estis
nekutimaj, la esperantistoj montris, ke ili ne kontentas nur pri
virtualaj aranĝoj, sed ke ili deziras havi pli da realaj renkontiĝoj.
La reduktita amplekso de la programo lasis pli multe da tempo por
neformala amikumado, ripozo kaj distro, kion ni bezonas post pluraj
monatoj de batalo kontraŭ la koronviruso.
Post la paŭzo kaŭzita per la koronvirusa krizo, Bjelovara Esperantista Societo komence de junio 2020 startigis la unuajn konkretajn aktivecojn. Kunsidoj de la Administra kaj Kontrola Komitatoj okazis la 4-an de junio kaj la 6-an de julio, kaj la 18-an de junio Josip Pleadin organizis por deko da societanoj tre interesan prelegon kaj foto-projekcio, titolitan „En la lulilo de Esperanto - Dek tagojn vojaĝante tra Pollando”.
Dankdiplomon kaj foto-monografion „110 jaroj de Esperanto en Bjelovar“, kies eldonadon subtenis la Urbo Grubišno Polje, al la urbestro Zlatko Mađeruh, komence de junio 2020, transdonis Franjo Forjan kaj Nenad Margetić, prezidanto kaj kasisto de Bjelovara Esperantista Societo.
Tiuokaze la urbestro Mađeruh akcentis, ke kun Franjo Forjan li kunlaboras dum multaj jaroj, aldonante, ke li fartas iomete malagrable pro la atento, kiun al Grubišno Polje oni donas pro la simbola helpo. „Esperanto estas tradicio longa pli ol 110 jarojn, kiun ni en Grubišno Polje ne evoluigis, sed ni subtenus tian iniciaton“ – diris la urbestro Mađeruh, akceptante la dankdiplomon.
En la laborplano por 2020 estas antaŭvidite, ke Bjelovara Esperantista
Societo organizos vojaĝon al la 21-a Alp-adria Esperanto-konferenco,
kiu okazos en la eŭropa ĉefurbo de kulturo Rijeka, inter la 5-a kaj
7-a de junio 2020.
La bjelovaranoj transprenis la taskon organizi
komunan buson per kiu vojaĝos ankaŭ esperantisto el aliaj lokoj de nia
regiono kaj Zagrebo.
Kvankam la konferenco estas anoncita, ĉi-momente ĝia senĝena okazigo
estas necerta pro la koronaviruso, aparte ĉar Rijeka najbaras al la
itala landlimo kaj ĉar parton de la partoprenantoj kutime faras ankaŭ
italaj esperantistoj.
Aktualajn informoj pri la konferenco kaj la vojaĝo sekvu ĉi-loke.
Dimanĉon, la 23-an de februaro 2020, je la 10h30, en la ejo de la Ĉeĥa komunumo okazis regula jarkunveno de Bjelovara esperantista societo. Komence la prezidanto de DEB Franjo Forjan legis la ricevitajn salutmesaĝojn de Kroata Esperanto-Ligo kaj niaj membroj Vinko Grgurev el Vodice, Milica Ježovita el Križevci kaj Ivana Pleskina el Rijeka. Per unuminuta silento oni omaĝis la societanon kaj membron de la Estraro de DEB Martin Fejer, kiu forpasis en 2019.
Post akcepto de la proponita tagordo kaj elekto de labor-prezidantaro, estis konigita la decido pri atribuo de specialaj diplomoj al la eksa urbestro de Bjelovar Antun Korušec kaj lia anstataŭantino Lidija Novosel, kiuj dum pluraj jaroj subtenadis nian agadon. Estis transdonitaj ankaŭ diplomoj al Ivan Petreković kaj Dokumenta Esperanto-Centro el Đurđevac.
Dum la jarkunveno estis prezentita raporto pri agado dum 2019 (Grozdana Grubišić-Popović), materia kaj financa raporto (Nenad Margetić) kaj raporto de la Kontrolkomitato (Zdenka Polašek), kiuj estis ĉiuvoĉe akceptitaj. Post akcepto de la raportoj, la prezidanto de DEB Franjo Forjan tralegis proponon de laborplano kaj Zdenka Polašek financan planon por 2020. Ambaŭ proponoj estis unuanime akceptitaj. La jarkunveno finiĝis je la 11h40 kaj la ĉeestintoj daŭrigis amikumi en la Kafejo kaj dolĉaĵejo "Zagorje".
Raporton pri agado en 2019 vidu ĈI TIE.
Laŭ laborplano por 2020, Bjelovara Esperantista Societo intencas organizi sian 8-an renkontiĝon „Esperantistoj de Bjelovar al sia urbo” la 18-an kaj 19-an de septembro 2020. Ni prezentas al vi provizoran programon de la aranĝo.
Vendredon, la 18-an de septembro 2020:
- Interkona vespero en la Kafejo kaj dolĉaĵejo „Zagorje”,
- Malfermo de pentraĵekspozicio de la franca pentristino kaj esperantistino Lilli Giloteaux (1924-2013).
Sabaton, la 19-an de septembro 2020:
- Sankta meso en Esperanto,
- Prelego de ĉilia esperantisto José Antonio Vergara pri kroatoj en Ĉilio kaj malfermo de tema ekspozicio en la Popola biblioteko Petar Preradović en Bjelovar,
- Prezento de libreto „Pasporto pri Zamenhofaj Esperanto-Objektoj en Kroatio”,
- Ekskurso al Đurđevac kaj la rezervejo de la rivero Drava en la vilaĝo Križnica apud Pitomača,
- Transiro al Križnica per pramo kaj reveno laŭ la pendanta ponto,
- Tagmanĝo en restoracio en Križnica kun prezento de infana bildlibro „La aventuroj de Jombor kaj Miki” de la bulgara verkisto Julian Modest.
La definitivan programon de la aranĝo ni poste publikigos en nia retpaĝaro.
La membro de Bjelovara Esperantista Societo Damir Matašin la 1-an de marto 2020 vizitis la esperantistojn en la aŭstralia urbo Sidnejo kaj nome de nia societo transdonis al ili la monografion „110 jaroj de Esperanto en Bjelovar” kaj aliajn modestajn donacojn.
En la akompana letero adresita al Esperanto-Federacio de Novsudkimrujo la bjelovaraj esperantistoj rememorigis pri la fakto, ke el nia regiono antaŭ 90 jaroj al Aŭstralio elmigris esperantisto Ivan Matašin, konata inter la sidnejaj esperantistoj sub la nomo John Matasin. Ivan Matašin naskiĝis en Ruškovac, kaj li havas nemezureblajn meritojn por Esperanto en Sidnejo. Per liaj klopodoj la sidnejaj esperantistoj akiris la Esperanto-domon en la kvartalo Redfern, kiun ankaŭ nuntempe ili posedas. Ĝuste en tiu domo nia membro Damir Matašin transdonis la donacojn de la bjelovaraj esperantistoj al siaj aŭstraliaj kolegoj memore al la nerompeblaj ligoj de nia regiono kun Sidnejo. Signe de eterna danko, sur la muro en la Esperanto-domo en Redfern hodiaŭ pendas memor-plakedo al Ivan Matašin el Ruškovac.
E-mail Prezidanto Franjo Forjan